«اۋليە ترويتسا» ريم-كاتوليك شىركەۋىندە پاسحا مەيرامى اتاپ ءوتىلىپ, وعان جينالعان جۇرتشىلىق جاراتقانعا جالبارىنىپ, ادامدارعا مەيىرىمدىلىك,ەلگە تىنىشتىق, بەيبىت ءومىر تىلەدى. ءدىندارلاردى وبلىس اكىمىنىڭ اتىنان ورىنباسارى ماديار قوجاحمەت قۇتتىقتاپ, حريستيانداردىڭ باستى مەرەكەسىنىڭ ادامداردى ءبىر-بىرىنە جاقىنداستىراتىن, جىلىلىق سىيلايتىن, جاقسىلىققا ۇندەيتىن ماڭىزىن اتاپ ءوتتى.
«سولتۇستىكقازاقستاندىقتار ءدىني ۇستانىمىنا قاراماستان كەز كەلگەن مەرەكەنى بىرلەسىپ تويلاۋدى داستۇرگە اينالدىرعان. پاسحانى اتاپ ءوتۋ كەزىندە ادامداردىڭ ءبىرى-بىرىنە دەگەن سەنىم, توزىمدىلىك قاسيەتتەرى جاس بۋىنعا ۇلگى-ونەگە ەتىلەرى انىق, دەدى م. قوجاحمەت.
«اۋليە ترويتسا» ريم-كاتوليك شىركەۋىنىڭ ناستوياتەلى توماش ياكۋبچاك ءمىناجات ەتۋشىلەردى سابىرلى بولۋعا شاقىرىپ, ءدىني جاقسى داستۇرلەردى ۋاعىزدادى. ليتۋرگيادان كەيىن كوستەلگە جينالعاندار ءبىر-ءبىرىن پاسحا مەرەكەسىمەن قۇتتىقتادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
